Nagsaka na sa 101 ang reported nga napatay sa Pilipinas bangud sa Bagyo Paeng.
Sa sini nga numero suno sa National Disaster Risk Reduction and Management Council (NDRRMC), 73 ang kumpirmado samtang 28 naman ang kinahanglan pa sang validation.
70 naman ang reported injuries kag 66 ang missing.
Ini nga figures ang nareport halin sa Central Luzon, Bicol, Calabarzon, Mimaropa, Western Visayas, Eastern Visayas, Zamboanga Peninsula, Soccsksargen, Bangsamoro Autonomous Region for Muslim Mindanao or Barmm, kag sa Cordillera Administrative Region.
Nagsaka naman sa 2,039,363 ang apektado nga indibidwal ukon katumbas sang 618,817 ka mga pamilya.
Ang sektor naman sang agrikultura ang naka-record sang P1.33 billion nga balor sang halit samtang P760.3 million naman sa imprastraktura.
Sa agrikultura, ang pinakaapektado amo ang humay nga may pyerde nga P1.2 billion.
Ang iban pa nga nahalitan sa agriculture sector amo ang mais (P5.6 million), high value crops (P60 million), livestock and poultry (P1.9 million), kag fisheries (P16 million).
Ginakahangaw-an nga ang kapyerdehan sa agricultural goods ang mahimo pa nga makapasaka sa inflation rate sa pungsod.
Kahapon, gin-estimate sang Bangko Sentral ng Pilipinas nga ang inflation sa October ang mahimo magtupa sa 7.1% kag 7.9% bangud sa lain lain nga factor kaangay sang transport fare hikes, mataas nga domestic petroleum prices, mataas nga agricultural commodity prices bangud sa nag-agi nga mga bagyo, kag amo man ang padayon nga pagluya sang balor sang Philippine peso.
