ILOILO CITY- Madamo pa sang mga eskwelahan sa Western Visayas ang wala sa gihapon nagapatuman sang full swing face to face classes.
Sa interview sang Bombo Radyo kay Mr. Hernani Escullar Jr.,spokesperson sang Department of Education Region 6, iya ginpahayag nga sa 4,014 ka mga eskwelahan sa rehiyon, 884 pa ang nagpakamaayo nga magpatuman anay sang blended learning modality kag may isa nga nagpatuman sang full distance learning.
Suno kay Escullar, ini nga mga eskwelahan ang indi sa gihapon handa sa full implementation bangud sa pila ka rason kaangay na lang sang paglaslas ni Bagyo Paeng nga nagbilin sang kahalitan sa mga buluthuan kag classrooms.
May kaangtanan naman sa gin- isyu ni Presidente Ferdinand Marcos nga Executive Order nga nagasiling nga optional na lang ang pagsuksok sang facemasks sa mga classrooms, ginpahayag ni Escullar nga wala pa ini ginapatuman bangud nga kinahanglan anay nga magpagwa sang order ang Department of Education Central Office agud mangin balasehan sang mga eskwelahan sa pagpahanugot sa mga estudyante nga magkakas sang facemask samtang yara sa ila hulot-klasehan.
