ILOILO CITY- Magapatawag sang pagsinapol si Iloilo City Mayor Jerry Trenas upod kay Senator Loren Legarda kag sa mga myembro sang Regional Development Council.
Sa interview sang Bombo Radyo kay Mayor Trenas nga amo ang chariman sang Infrastructure Committee sang Regional Development Council, iya ginpahayag nga katuyuan sang pagsinapol nga gintalana sa Nobyembre 8 amo nga magpatigayon sang assessment sa damage sang Bagyo Paeng.
Suno sa alkalde, imbitado sa amo nga meeting ang tanan nga gobernador,mga kongresista sa Panay, kag ang mga alkalde sang Roxas, Panay, Panit-an, kag Pontevedra.
Imbitaron man sanday Regional Development Council Chair Mayor Albee Benitez kag Co-chair Jobert Peñaflorida.
Dugang sang opisyal, hingyuon nila ang Department of Public Works and Highways nga mag-report tuhoy sa damage, ang amount nga kinahanglanon para sa repair kag kun ano kalawig ang tiempo nga kinahanglanon.
Pangabayon man ang Department of Public Works and Highways, National Irrigation Administration kag Department of Environment and Natural Resources nga magpresentar sang ila proposed projects agud malikawan ang kaangay nga problema sa palaabuton.
