ILOILO CITY – Magasugod na subong nga adlaw ang debate may kaangtanan sa proposed budget para sa tuig 2023 matapos nga gin-endorso na ini sang mga senador sa plenary.
Si Senator Juan Edgardo “Sonny” Angara, chairperson sang Committee on Finance ang nag-present sang ginaduso nga P5.268 trillion national budget pila ka semana matapos ang malawig nga committee hearings sa Senado.
Sa sponsorship speech, ginpahayag ni Angara nga ang 2023 national budget ang mangin reflection sang ginaduso sang bag-o nga administrasyon.
Ini amo ang pagpaumwad, paghagan-hagan sang kapigaduhon, pagbuhin sang deficit kag utang kag agud nga malakip ang Pilipinas sa grupo sang mga upper middle-income nations.
Dugang pa niya, ang 2023 national budget ang magasolbar sang padayon nga pagtaas sang populasyon, ang nagasaka nga presyo sang goods kag services kag infrastructure needs.
Ini ang magahatag man sang labing kinahanglan nga solusyon sa nagkalain-lain nga epekto sang away sa tunga sang Russia kag Ukraine, natural nga kalamidad kag ang coronavirus disease 2019 pandemic.
Si Senator Pia Cayetano nga amo ang senior vice chairperson sang komitiba ang nag-co-sponsor sang proposed budget.
Siya man ang maga-defend sang proposed budgets sang Department of Health, Department of Education, Commission on Higher Education, state colleges and universities, cultural agencies, kag sang Development Academy of the Philippines.
Ang plenary deliberations sang proposed General Appropriations Act ang naka-schedule subong nga adlaw.
Una na nga ginpahayag ni Senate President Juan Miguel Zubiri nga ipaiway sang mga senador ang mga committee hearings sa masunod nga tatlo ka semana agud nga makatutok sa pag-scrutinize sang budget kag ma-aprubahan sa final reading sa November 23 ukon mas temprano pa.
Ang lower kag upper houses sang Congress ang nagaplano nga mapresentar ang bicam-approved budget kay President Ferdinand Marcos, Jr. sa ikaduha nga semana sang Disyembre agud nga mapirmahan sang presidente antes ang paskwa.
