ILOILO CITY – Ginpanan-aw nga posible duha ka beses sa masunod nga tuig ang pagbisita ni Presidente Ferdinand Marcos, Jr. sa Estados Unidos.
Suno kay Philippine Ambassador to the US Jose Manuel “Babe” Romualdez, magatambong si Marcos sa ikaduha nga Summit for Democracy nga hiwaton sa bulan sang Hunyo.
Sang December 2021, si United States President Joe Biden ang nagpamuno sa Summit for Democracy.
Suno kay Romualdez, nagaplano man ang Estados Unidos nga mag-host sang annual meeting sang Asia-Pacific Economic Cooperation sa masunod nga tuig.
Dugang pa niya, sa sulod sang halos 13 ka tuig, wala na nakapatigayon sang state visit ang Pilipinas kag sa sulod sang walo ka tuig, wala sang presidente nga nakapadulong sa Estados Unidos.
Ang katapusan nga presidente sang Pilipinas nga nagbisita sa Washington amo si Benigno Aquino III nga nagpadulong sa White House sang 2012.
Ang katapusan nga state visit sang Presidente ang natabo sang 2003 sang nagpadulong si anay President Gloria Macapagal Arroyo nga gin-welcome ni anay President George W. Bush.
Si anay Presidente Rodrigo Duterte ang nagpanindugan nga indi gid siya magbisita sa Washington bangud sang pagpakamalaot sang US officials sa anti-narcotics campaign sang pungsod nga nagpatay sang madamo nga mga drug suspects.
Si Marcos naman ang nagbisita sa Estados Unidos sang nagtambong ini sang 77th United Nations General Assembly sang Septyembre.
