ILOILO CITY – Indi na magpatol si Justice Secretary Jesus Crispin Remulla sa mga akusasyon batuk sa iya sang suspendido nga director sang Bureau of Corrections nga si Gerald Bantag.
Sa isa ka mensahe, manubo gid lamang ang sabat ni Remulla sang ginkuhaan sang reaksyon sa panawagan ni Bantag nga mag-resign bilang tiglikom sang Department of Justice bangud sa pagpahilabot sa imbestigasyon sa pagpatay sa broadcaster nga si Percy Lapid.
Suno kay Remulla, dapat nga magpakalalaki si Bantag kag atubangon ang mga reklamo nga ginpasaka sang Philippine National Police kag sang National Bureau of Investigation batuk sa iya.
Wala na sang komento si Remulla sa pagkwestiyon ni Bantag sa iya kredibilidad agud nga pamunuan ang Department of Justice.
Matandaan nga ginhangkat ni Bantag si Remulla nga magpanaog sa pwesto bangud wala na ini sang kredibilidad sa ginapahayag nga pag-condition sang isip sang publiko nga ang anay director sang Bureau of Corrections ang yara sa likod sa pagpatay kay Lapid.
Si Remulla ang yara subong sa Geneva, Switzerland para sa Universal Periodic Review sang United Nations Human Rights Committee sa sitwasyon sang humanitarian rights diri sa Pilipinas.
