Ipaguwa na sang Department of Justice (DOJ) prosecutors ang mga subpoena subong nga adlaw kanday suspended Bureau of Corrections (BuCor) Director General Gerald Bantag kag pila ka iban pa nga ginpasakaan man sang murder complaint bangud sa pagpatay sa brodkaster nga si Percy Lapid.
Kun ma-isyu na ang subpoena para sa pagpakita ni Bantag kag pagpasa sang counter-affidavits kasunod sang ginapangatubang nga murder complaints, buot silingon, opisyal naman nga naga-umpisa ang preliminary investigation sang amo nga mga panumbungon.
Ginpahayag naman ni Justice Secretary Jesus Crispin C. Remulla nga maga-file ang DOJ sang petisyon sa trial courts para maisyuhan sang precautionary hold departure order sanday Bantag kag si BuCor s Deputy Security Officer Ricardo S. Zulueta nga pareho nga gintudlo nga principals by inducement sa pagpatay kanday Percy Lapid kag Jun Villamor, ang inmate sa Bilibid nga amo ang ginatudlo middleman sa kaso.
Kun may yara na sang precautionary hold departure order, indi pwede makagwa sanday Bantag kag Zulueta sa Pilipinas samtang nga gina-conduct pa sang prosecutors ang preliminary investigation.
