Mga Pinoy, handa nga magpauli sa Pilipinas kun maglala ang sitwasyon sa Poland kasunod sang missile strike

ILOILO CITY- Nagpanawagan ang United Nations sang maid-id nga imbestigasyon sa natabo nga pagtupa sang missile sa Poland nga nagpatay sang duha ka tawo.

Natabo ini sa Przewodow nga yara nahamtang sa border sang Poland kag Ukraine.

Suno kay United Nations Secretary General António Guterres, dako ang iya pagkabalaka sa amo nga explosion kag kinahanglan nga indi na ini masundan.

Suno naman kay North Atlantic Treaty Organization Secretary General Jens Stoltenberg, nakig-istorya na ini kay Polish President Andrzej Duda kag gina-monitor na sang military alliance ang sitwasyon.

Ginpahayag naman ni Polish President Duda nga indi pa maathag kun paano natabo ang paglupok sang missile apang posible suno sa iya nga isa ini ka Russian-made missile,apang padayon pa ini nga ginaimbestigaran.

Nahibaluan nga ang ginatudlo nga responsable sa pagpalupad sang missile amo ang Russia.

Suno kay Bombo Neva Intrepido, Bombo International Correspondent direkta sa Warsaw, Poland, hugot nga ginpanginwala sang Russia nga sila ang dapat basulon sa natabo.

Mangin si US President Joe Biden ang nagsiling nga malayo nga ang missile nga nagtupa sa Poland ang ginpalupad halin sa Russia.

Suno pa sa mga US officials, apisar nga ginpahayag sang Poland nga Russian-made ang missile, apang nakit-an sa initial findings nga ginpalupok ini sang Ukrainian air defences.