ILOILO CITY- Bukas sa gihapon ang mga Filipino Americans nga supporters sang Republican Party sa Estados Unidos sa sin-o man nga mangin standard bearer sang partido para sa 2024 presidential elections.
Suno kay Bombo Raul Sabido, Bombo Correspondent sa Estados Unidos kag chairman sang Conservative Republican Filipino American sa Nevada, sa subong wala pa sila makahibalo kun sin-o ang ila iduso nga mangin presidentiable.
Ini bangud suno sa iya, si former US President Donald Trump pa lang ang nagpahayag sang intensyon nga magpadalagan liwat sa pagka-presidente.
Matandaan nga kahapon sang gin-anunsyo ni Trump ang iya presidential bid para sa 2024 nga eleksyon.
Para kay Sabido, ang temprano nga pag-anunsyo ni Trump sang iya pagkandidato ang mangin bentaha agud mas makatipon ini sang pondo gikan sa iya mga supporters agud magamit niya sa primary election sa Republican party.
Ginplastar naman ni Sabido nga isa ka pagpanghangkat nga atubangon sang anay presidente amo ang matunog subong nga pangalan ni Florida governor Ron DeSantis nga posible magpierde kay Trump sa primary election.
Suno pa kay Sabido apisar bentaha ni Trump amo ang iya mapag-on nga army of supporters apang base sa pinakaulihi nga polls, nagapanguna nga choice si DeSantis sa Republican primary voters sa diin 34% ang nakuha ni DeSantis kag 26% lamang ang nakuha ni Trump.
