Lima ang patay kag 18 ang pilason sa mass shooting nga natabo sa isa ka lesbian, gay, bisexual, transgender, and queer (LGBTQ) nightclub sa Colorado sa Estados Unidos.
Ginapahayag nga ang nasambit nga pagpang-atake ang kadungan sang Transgender Day of Remembrance ukon ang tuigan nga event nga nagadumdum sa transgender people nga ginpamatay bangud sang transphobic violence.
Suno sa Colorado Springs Police Department, posible nga maglain pa ang numero sang casualties samtang nga nagapadayon ang imbestigasyon.
Natabo ang shooting sa Club Q. Sa inisyal nga impormasyon, naka-kustodiya na ang suspek kag ginabulong sa isa ka local hospital.
Ini nga pagpangluthang ang amo ang pinakaulihi sa mga pagpang-atake sa LGBTQ venues sa Estados Unidos.
Ang pinakamamatay nga shooting ang natabo sa Orlando, Florida sang 2016 kun sa diin patay ang 49 ka tawo kag masobra 50 ang pilason.
