ILOILO CITY– Hugot nga ginapanindugan sang isa sa mga suspek nga ginpasakaan sang kaso sa three counts of murder may kaangtanan sa Estancia massacre nga wala gid ini sang bisan ano nga kahilabtanan sa insidente.
Sa interview sang Bombo Radyo kay Benzel Llamado, iya ginpahayag nga tubtob subong, indi ini makapati nga naulamid siya sa amo nga kaso.
Suno sa iya, matarong ini nga nagapangabuhi bilang isa ka negosyante nga nagabaligya sang second hand cars kag wala gid ini sang ano nga malain nga record.
Dugang niya, wala man ini nakakilala ukon koneksyon sa iban nga mga ginhingadlan nga mga suspek.
Nahibaluan nga magluwas kay Llamado, ginpasakaan man sang kaso sanday:
(1) Jevron Parohinog y Dela Rosa nga amo ang lone survivor sa insidente
(2) Jix Parohinog y Dela Rosa
(3) Michael Porras
(4) Michael Quiatchon y Alfante
Ginpasakaan man sang kaso ang anum ka mga John Does.
Ginpasiguro naman ni LLamado nga bug-os ang iya kooperasyon sa otoridad.
Nahibaluan nga ang mga biktima sa Estancia massacre nga natabo sang Septyembre 14 sa Villa Pani-an, Estancia, Iloilo amo ang mag-abyan nga sanday JP Bosque, Floyd Fernandes, kag Mark Libao.
