Sa isa ka indi kinaandan nga hitabo sa China, naguwa sa dalanon ang mga estudyante kag iban pa nga mga residente sa Shanghai kag nanawagan nga manaog na sa pwesto si Chinese President Xi Jinping kag mangin ang iban pa nga Communist Party leaders.
Ang nagpaibwal sang kaakig sang publiko amo ang natabo nga sunog sa apartment block sa Urumqi nga capital sang far western region sang Xinjiang.
10 ang patay kag siyam ang pilason sa amo nga sunog, kag ginapahayag nga na-delay ang mga bombero sa pag-responde kag pagluwas sa mga biktima bangud sa hugot nga lockdown measures nga ginapatuman.
Kasunod sini, nagprotesta ang mga estudyante sa universities sa Beijing kag Nanjing.
Ginkanta ang national anthem kag ang “the Internationale” — ang standard sang international communist movement.
May ginauyatan man ang mga estudyante nga blangko nga papel, isa ka symbolic protest batok sa censorship.
Ginpakamalaot man ang ginapatuman sang China nga zero-Covid.
Indi kinaandan ang mga protesta sa China bangud sandig sa pagsulundan sang Communist Party, ginadumilian ang tanan nga expressions of dissent.
Sa kada direct criticism sang isa ka tawo batok sa government kag sa president sang China, masami man nga may yara sang harsh penalties nga nagahulat.
