ILOILO CITY – Ginpa-Bombo sang pila ka pumuluyo sa Barangay Tamuan II, Janiuay, Iloilo ang tinuig na nga problema sa ila lugar kun sa diin, nagakatiphag ang duta nga resulta sang madugay na nga pagkutkot sang kanal nga agyan sang tubig nagikan sa Jalaur River Multi-Purpose Project sa banwa sang Calinog, Iloilo.
Sa interview sang Bombo Radyo kay Mrs. Salvacion Acanto, iya ginpahayag nga naguba na ang pila ka bahin sang iya balay kag propedad.
Makapila na sila ka beses nga nagpakay-o sang iya kudal bangud masami nga nagakaguba tuga sang pag-usmod sang duta.
May yara sang tonner bag nga ginbutang apang wala man sa gihapon sang epekto bangud nga nagakatiphag sa gihapon ang duta ilabi na kun magbubo ang mabaskog nga ulan.
Isa nalang ka dupa suno sa tagreklamo kag maguba na ang kabilugan sang iya balay.
Makapila naman sila ka beses nga nagreklamo sa National Irrigation Administration Region VI apang tubtob subong, wala sa gihapon nabalikan.
Sang naglaslas ang Bagyo Paeng, nagdako pagid ang pagtiphag sang duta.
Una nga nagpasalig ang ahensya nga sa Nobyembre 2, pakadtuan sang isa ka “designer” agud nga malantaw ang lugar apang tubtob subong, wala sa gihapon sang may nag-abot.
Nagapangabay ang tagreklamo nga kuntani, matalupangdan ang iya reklamo kag mabutangan sang temporaryo nga panagang ang nagaka-usmod nga duta agud nga indi matiphag ang iya balay.
‘Liwat nga butangan sang tonner bag’
Liwat nga pabutangan sang tonner bag ang nagakatiphag nga duta sa lugar bilang temporary slope protection sa Barangay Tamuan II, Janiuay, Iloilo.
Sa interview sang Bombo Radyo kay Steve Cordero, Watershed Management Chief kag official spokesperson sang Jalaur River Multi-Purpose Project Stage II, iya ginpahayag nga may yara sang una sang ginbutang nga toner bag apang naguba bangud sa bagyo Paeng.
Ang tonner bag ang makabulig agud nga mapunggan ang dugang nga pagtiphag sang duta.
Suno kay Cordero, hulaton anay nga matapos ang construction antes makabutang sang permanent slope protection.
Dugang pa niya, kinahanglan pa nga tun-an ang behavior sang duta sa lugar kag i-forward sa central office ang design.
Ginabanta magalawig sang duha tubtob tatlo ka bulan ang pag-finalize sini.
Sa subong suno sa iya, may yara sang ongoing assessment ang mga international consultants kag may initial instructions na sa field.
Gin-ako sang natungdan nga sang nagligad nga tuig, nakabaton na sang reklamo ang ila talatapan nagikan sa mga pumuluyo sang lugar.
