ILOILO CITY- Magahulat anay si Iloilo City Lone District Representative Julienne Baronda sang report halin sa Department of Public Works and Highways may kaangtanan sa kontrobersyal nga Ungka Flyover antes ini maghimo sang nagakaigo nga tikang.
Ini kasunod sang resolusyon nga ginpasar sang Pavia Municipal Council nga nagahingyo sa mga mamalidha sang syudad kag probinsya nga maghimo sang representasyon sa Kongreso agud magpatigayon sang legislative inquiry in aid of legislation kaangot sa depektibo nga Ungka flyover kag delayed construction sang Aganan flyover.
Ang resolution nagapangabay kanday Iloilo City Lone District’s Cong. Julienne Baronda, 1st District Rep. Janette Garin, 2nd District Rep. Michael B. Gorriceta, 3rd District Rep. Lorenz Defensor, 4th District Rep. Ferjenel Biron, 5th District Rep. Raul Tupas, Uswag Ilonggo party-list Rep. James Ang, AAMBIS-OWA Rep. Lex Anthony Colada, kag Kabataan party-list Rep. Raoul Manuel.
Sa interview sang Bombo Radyo kay Iloilo City Lone District Representative Julienne Baronda, iya ginpahayag nga wala pa niya nabaton ang amo nga resolusyon apang suno sa iya, ginakilala niya ang pagtinguha ni DPWH Secretary Manuel Bonoan nga maimbestigaran gid ang ginhalinan sang pag-usmod sang Ungka Flyover.
Suno kay Baronda, ginpat-ud sa iya ni Bonoan nga mapangitaan gid sang pinakamaayo nga remendyo ang amo nga proyekto.
Nahibaluan nga nagpadulong na sa Iloilo ang mga opisyal sang ahensya agud malantaw ang sitwasyon sang flyover.
Pahayag ni Baronda, sa masunod nga semana, liwat sila nga makigkita kay Bonoan agud mapangayuan sang update ang ahensya sa kun ano ang rekomendasyon sa amo nga proyekto.
