ILOILO CITY- Nagahingyo ang Iloilo City Council sang expert opinion ilabi na sang Philippine National Police tuhoy sa pagpatuman sang signal jamming bilang kabahin sang security measures para sa Dinagyang Festival 2023.
Una diri, nagpasar sang resolution ang konseho nga nagaimbitar sa Philippine National Police, telecommunication companies, kag Iloilo Festivals Foundation Inc. (IFFI) agud mag- presentar sang ila panan-awan tuhoy sa amo nga isyu sai sa ka committee hearing sa Disyembre 15, 2022.
Sa interview sang Bombo Radyo kay Iloilo City Councilor Rommel Duron, chairman sang Committee on Energy and Public Utilities, iya ginpahayag nga kun makumbinsi sila sa konseho nga may threat sa gihapon pareho sadto,mapasugot sila nga isakripisyoang pila ka pribilihiyo kag pila ka convenience.
Suno sa konseho, ang signal jamming ang nangin parte na sang security measures para sa festival, bangud nga madamo ang ginalauman nga bisita lakip na si First Lady Liza Araneta-Marcos, nga nagkumpirma na sang iya attendance.
Sa pihak nga bahin, ginpahayag naman sang kagawad nga may mga tinion nga required ang phone signals kaangay sang emergency ukon agud mag- promote sang live events sa social media.
Sang nagligad nga mga Dinagyang, gin-block ang mga mobile phone signals bangud nga ang National Telecommunications Commission ang nag-approve sang requests para sa mobile phone signal jamming agud malikawan ang security threats kaangay sang terrorist bombings.
