ILOILO CITY- Padayon pa nga ginahibalo ang responsable sa pagpangtiro sa apat ka mga salakyan sa Barangay Monica Bluementritt, Iloilo City Proper.
Ang nasambit nga mga salakyan ang naka-park sa sulod sang covered gym.
Ang mga ini ang ginapanag-iyahan nanday Prosecutor Ma. Monica Espinosa, Fillmore Espinosa, kag Lovely Obligacion.
Ang Black Chevrolet Sedan ang ginapanag-iyahan ni Prosecutor Espinosa apang ginagamit sang iya utod nga si Freddy Espinosa Jr..
Ang Montero Sports kag Honda CRV ang ginapanag-iyahan naman ni Filmore.
Ginapanag-iyahan naman ni Obligacion ang Toyota Rush.
Maswerte nga wala naman sang may napilasan sa insidente.
Sa interview sang Bombo Radyo kay Punong Barangay Antonio Espinosa, iya ginpahayag nga sang nagligad nga duha ka semana,ginbuslot man ang royda sang isa sa mga salakyan.
Suno kay Espinosa, posible nga personal ang motibo sa natabo nga pagpangtiro bangud kun politikaang motibo, posible nga siya ang mangin target.
Ginatan-aw man sang opisyal nga posible nga may naakig bangud indi mahampang sang basketball ang covered gym bangud sang mga salakyan nga naka-park.
