ILOILO CITY – Arestado ang dinosena ka mga tawo matapos ginpahayag may kaangtanan sa protesta batuk sa nagasaka nga presyo sang gatung sa Jordan kun sa diin, isa ka opisyal sang pulis ang napatay.
Ginbawian sang kabuhi si Colonel Abdul Razzaq Dalabeh, ang deputy police chief sang Maan province matapos nga gintiro sa banwa sang Al-Husseiniya samtang nagaresponde sa riot.
Suno sa Public Security Directorate, 44 ka mga tawo ang nag-upod sa lapnagon nga riot sa pila ka mga rehiyon sa kingdom ang ginpangdakup kag gindala sa korte.
Nagpadala na sang reinforcement sa mga probinsya.
Nagpaandam naman ang hari sang Jordan nga si King Abdullah II sa sin-o man nga magbato sa gobyerno.
Duha pa ka pulis ang napilasan matapos nga gintiro.
Ang mga taxi kag truck drivers sa pila ka mga probinsya sa southern Jordan ang nagpatigayon sang strike pila na ka semana ang nagligad.
Gin-updan man sila sang mga bus drivers kag mangin ang mga negosyante ang nagsirado sang ila balaligyaan bilang protesta sa padayon nga pagmahal sang gatung.
Nahibaluan nga nagdoble pa ang presyo sang gatung sa Jordan ilabi na ang diesel nga amo ang ginagamit sang mga trucks kag buses.
Ginduso naman sang gobyerno ang relief measures lakip na ang financial aid para sa labing apektado nga mga pamilya.
