Third party audit team sang DPWH, patapuson pa ang holidas antes makahimo sang assessment sa Ungka flyover

ILOILO CITY- Patapuson pa ang holiday season antes makapatigayon sang assessment ang third party audit team nga ginkuha sang Department of Public Works and Highways sa pag-usisa sang problema sa kontrobersyal nga Ungka Flyover.

Sa interview sang Bombo Radyo kay Iloilo Gov. Arthur Defensor Jr., iya ginpahayag nga gin-imbitar siya sang Regional Project Monitoring Committee sang National Economic and Development Authority Region 6 nga magtambong sa high-level technical meeting kahapon.

Suno sa gobernador, tuman ka importante ang report halin sa Department of Public Works and Highways angot sa status sang flyover.

Pahayag ni Gov. Defensor, pinaagi sa third party audit team, magahimo sang assessment ang professionals nga indi kabahin sang nasambit nga proyekto agud nga makahatag sang tul-id nga impormasyon kun ano ang sala sa istruktura sang Ungka Flyover.

Mas maayo gid kuntani suno kay Defensor nga mapadasig ang pagkaayo agud nga mabuksan kag magamit liwat ang flyover.

Ang deperensya kag timeline kun san-o matapos ang pagkaayo sa flyover ang mahibaluan pa kun magtapos naman ang assessment nga himuon sang third party audit team.

Plano man liwat sang gobernador nga magpadulong sa Manila apisar nga holiday kun may yara sang tyempo si Sec. Manuel Bonoan kag makaatubang ini kag maistorya tuhoy sa Ungka Flyover bangud sang nagpadulong siya sang nagligad nga semana, wala sila mag-abtanay ni Bonoan.