ILOILO CITY – Padayon nga nagabubo ang mensahe sang pagpalangga kag pangamuyo matapos ang kamatayon ni Pope Emeritus Benidect XVI.
Kahapon sang ginkumpirma sang Vatican nga nagtaliwan na ang anay Santo Papa sa edad nga 95.
Sa ginpatigayon nga New Year’s Eve service ni Pope Francis sa St. Peter’s Basilica, naghatag ini sang pagrespeto sa ginkabig niya nga “noble” kag “kind” nga pope emeritus.
Ginpasalamatan sini ang conservative German theologian sa tanan nga maayo nga ginhimo sini kag gin-emphasize ang mga sakripisyo sini para sa ikaayo sang simbahan.
Halos walo ka tuig man sini nga ginpamunuan ang Catholic Church, apang sang 2013, nag-resign siya bangud sa problema sa ikaayong lawas.
Nabun-ag si Benedict bilang Joseph Ratzinger sa matuod nga pangalan sa Germany.
78 anyos siya sang naeleher bilang Santo Papa sang 2005. Isa siya sa ginakilala sa oldest popes nga na-elect sa posisyon.
Antes nangin Santo Papa, kilala siya nga si Cardinal Joseph Ratzinger, head sang doctrinal watchdog sang Vatican nga ginatawag Congregation for the Doctrine of the Faith.
24 anyos nga gin-uyatan sini ang amo nga papel.
Sang nagligad lang nga adlaw, naghingyo sang special prayer sa publiko si Pope Francis bangud sa ginpahayag nagalala na nga kahimtangan sang Pope Emeritus.
Ang lawas ni Benedict ang iga-display humalin sa Lunes sang aga sa St Peter’s Basilica agud nga ang mga tinutu-o ang makahatag sang ila respeto antes ang “solemn” apang simple nga lubong.
Siya ang ilubong sa lulubngan sang mga Santo Papa sa St Peter’s Basilica.
Lakip man sa mga nagkasubo kag nagpangamuyo kasunod sang kamatayon ni anay Pope Benedict XVI amo si President Ferdinand Marcos Jr.
Sa statement sang presidente, ginpahayag sini nga naga-isa ang bug-os nga pungsod sa paghatag sang pangamuyo para sa kapahuwayan sang kalag sang anay Santo Papa.
Ang Pilipinas ang may yara sang pinakadako nga Catholic population sa Asya.
Suno naman sa Catholic Bishops’ Conference of the Philippines, si Benedict XVI ang padayon nga kilalahon bilang “pope of charity.”
Sa statement nga ginpagwa sang presidente nga si Pablo Virgilio David, ginsuguran ni Pope Benedict ang iya episcopacy sa isa ka theological encyclical nga may tig-ulo nga Deus Caritas Est ukon God is Love.
Ginpahayag man niya nga si Benedict XVI ang isa ka maayo nga theologian, catechist, kag musician.
Magluwas sa ila, naghatag man sang mensahe sanday Russian President Vladimir Putin, Ukrainian President Volodymyr Zelenskyy, France President Emmanuel Macron, Germany Chancellor Olaf Scholz, Italy Prime Minister Giorgia Meloni, United Kingdom Prime Minister Rishi Sunak kag madamo pa.
