ILOILO CITY – Madamo sang nalipay matapos nakita ang recent photos sang queen of all media nga si Kris Aquino.
Sa pictures nga gin-share ni Batangas Vice Governor Mark Leviste, makita nga na-undan na si Kris samtang nga nagapakigbato sa madamo nga autoimmune diseases.
Sa caption ni Leviste, malipayon ini bangud nga naka-upod niya sa mismo una nga adlaw sang tuig 2023 ang iya su-od nga abyan nga si Kris sa California, United States.
Sang nagligad nga Disyembre 24, naghatag si Kris sang update sa iya medical condition kag ginpasalamatan ang tanan nga nagpangamuyo para sa iya madasig nga recovery kag nagdumdom sa iya kag sa iya duha ka mga anak.
Suno pa sa TV host-actress, duha sa apat niya ka autoimmune ailments ang makabig nga life-threatening kag ang ikalima ang delikado man bangud sang iya distinct physical manifestations.
Ginpili niya nga ipakigbahin ini sa publiko bangud suno sa iya, gusto niya nga magpasalamat sa tanan nga nagpangamuyo para sa iya kag sa iya mga anak kag mga utod.
Yara na sa Estados Unidos si Kris sa sulod sang masobra anum ka bulan kag ginaproseso na ang pagpalawig pa sang ila pagtinir didto para sa iya treatment.
