Iloilo City – Nagapadayon pa ang imbestigasyon sang mga pulis sa natabo nga shooting insident sa Zamora St., Brgy. Monica Bluementritt, Iloilo City Proper kun sa diin pilason ang duha ka magpakaisa.
Ang mga biktima amo sanday Benjamin Espinosa kag Pascual Jose Ramon Espinosa.
Sa interview sang Bombo Radyo kay Police Major Shella Mae Sangrines, hepe sang Iloilo City Police Station 1, iya ginpahayag nga samtang naga-inom ang mga biktima sa atubang sang ila balay, nag-abot ang suspek kag gintiro ang mga ini.
Madasig naman nga nakapalagyo suspek sakay sa motorsiklo padulong sa direksyon sang Plaza Libertad.
Samtang, indi pa matumod ang armas luthang nga gingamit sa pagpaniro.
Matandaan nga sang Disyembre sang nagligad nga tuig, may natabo man nga strafing incident sa Barangay Monica Bluementritt, Iloilo City Proper.
Ginpangtiro ang apat ka mga salakyan nga naka-park sa sulod sang covered gym sang amo nga tion.
Ang mga ini ang ginapanag-iyahan nanday Prosecutor Ma. Monica Espinosa, Fillmore Espinosa, kag Lovely Obligacion.
Wala sang may napilasan sa amo nga insidente sa amo nga tion.
Ginahibalo pa sang otoridad kun may kaangtanan ini sa bag-o nga shooting incident.
Sa interview sang Bombo Radyo kay Former Punong Barangay Frank Espinosa, palaligban tubtub subong kun sin-o ang mga suspek.
Para sa anay punong barangay, wala siya nagapati nga may labot ini sa natabo sa strafing incident.
