Indi lamang high-ranking police officers ang iga-subject sa maid-id nga review bilang kabahin sang internal cleansing sang Philippine National Police (PNP).
Suno kay PNP chief Rodolfo Azurin Jr., kun matapos na ang paglantaw sa rekord sang third-level officers nga nagsumite sang courtesy resignations, iga-sunod ang mga pulis nga may mas manubo nga rangko ukon ang second-level officers.
Ang third-level officers ukon ang una nga nagsunod sa mandu ni Interior Secretary Benjamin Abalos Jr. nga magpasa sang courtesy resignations amo ang may mga posisyon halin sa full colonel-pa-general.
Ginpahayag ni Azurin nga importante nga busision ang second-level nga police officials bangud sila ang yara sa ground. Ang second-level sa PNP amo ang mga lieutenant tubtub sa lieutenant colonel para sa police commissioned officers, kag patrolman/patrolwoman pa- executive master sergeant para naman sa non-commissioned officers.
Matandaan nga ang panawagan ni Abalos ang kabahin suno sa tiglikom sang tikang sang administrasyon agud nga malimpyuhan ang hanay sang kapulisan gikan sa mga opisyal nga may kaangtanan sa iligal nga droga.
May committee nga ginabug-usan sang lima ka myembro nga amo ang maga-determine kun may labot sa illegal drug trade ang opisyal nga magapasa sang courtesy resignation. Si President Ferdinand Marcos Jr. suno sa tiglikom ang maga-desisyon kun batunon ukon indi ang resignation sang pulis base sa findings kag rekomendasyon sang committee.
Indi pa subong maathag kun ano ang himuon sa mga pulis nga wala nagpati sa panawagan ni Abalos. Tubtub sa Enero 31 ang ginhatag nga petsa para sa pagpasa sang courtesy resignations. ##
