Iloilo City – Paga-imbestigaran sang Police Regional Office 6 ang insidente sang kinagamo sa tunga sang duha ka grupo sa Diversion Road, Mandurriao, Iloilo City.
Matandaan nga apat ang sakay sa pick-up nga tuyo kuntani maglibot-libot sa syudad sang Iloilo agud mag joyride.
Nakilal-an ang sakay sang pick-up nga amo sanday Mark Wilheim Bechayda, 24, residente sang Barangay San Jose Tagbak, Jaro; Ramir Gallardo, 24, residente sang Barangay Rizal, Lapuz; kag John Obbett, 24, residente sang Barangay Zone 2, Ticud, La Paz, Iloilo City kag isa pa ka babayi.
Samtang, nagdangat sa pulo tubtob kinse ang magkatimbang nga bahin sang mga pamatan-on nga ginapahayag halin sa isa ka birthday party kag pauli na kuntani sa ila mga balay sa City Proper ang mga pamatan-on.
Nahibaluan, nga sang naglabay na ang pick-up sa grupo sang mga pamatan-on, hinali lang nga nakabati sang lagapok kag gahud nagikan sa grupo sang pamatan-on.
Sa interview sang Bombo Radyo kay Police Brigadier General Leo Francisco, Director sang Police Regional Office 6, iya ginpahayag nga nakasugilanon na sila ni Iloilo City Police Office Director Police Colonel Leo Batiles nga augmentation sang mga kapulisan agud mas pagahugtan ang seguridad sa syudad sang Iloilo kadungan sa kinagamo sa Diversion Road kag sa nagahilapit nga Dinagyang Festival 2023.
Suno kay Francisco, nagakadapat nga simultaneous ang shifting sang Iloilo City Police Office kag indi pag-isalig ang augmentation sa Regional Headquarters ang pagbantay sang syudad sang Iloilo
Dugang pa sang natungdan, magapatawag siya liwat sang pagsinapol kay Batiles tuhoy sa deployment sang kapulisan para plantsahon ang duty scheule sang mga kapulisan.
