ILOILO CITY – Nagpasalig si Defense Secretary Carlito Galvez Jr. nga maresolba ang indi pag-intindihanay sa sulod mismo sang Armed Forces of the Philippines sa una nga quarter sang 2023.
Ini ang ginpahayag ni Galvez sa ginpatigayon nga Senate hearing.
Gin-ako ni Galvez nga may yara sang reklamo sa military ranks bangud sang wala ginalauman nga epekto sang Republic Act 11709 nga naga-grant sang tatlo ka tuig nga fixed term para sa key officials sang Armed Forces of the Philippines lakip na ang chief of staff.
Dugang pa niya, ginpasalig nila sa presidente nga kay-uhon ang mga butang sa labing madali nga tion.
Ginbuyagyag niya nga personal niya nga gin-request kay President Ferdinand “Bongbong” Marcos Jr. nga maghimo sang appointments antes magpadulong sa Davos, Switzerland para sa World Economic Forum.
Suno pa sa natungdan, napirmahan na ni Marcos ang tanan nga appointment.
Pahayag pa ni Galvez, naatrasar ang appointments bangud sang election ban kag transition nagikan sa Duterte administration kag sang Marcos administration.
Ginpahayag pa sang defense secretary nga ang delayed appointments ang maka-apekto sa mga opisyal nga na-belong sa Class ’90 tubtob ’94.
Nagareklamo naman suno sa iya ang mga opisyal may kaangtanan sa “sense of fairness and meritocracy” kag nagpabutyag nga amyendaran ang layi nga naga-discriminate sa ila nagikan sa competition.
Nahibaluan nga ang Senate committee on national defense and security, peace, unification, and reconciliation ang nag-discuss sang hagna nga nagatuyo nga mag-amend sang Republic Act 11709.
