Naghingyo si Presidente Ferdinand Marcos Jr. sa mga senador nga mangin mahinalungon sa pag-review sa kontrobersyal nga Maharlika Investment Fund bill.
Apisar mas maayo suno sa iya kun matapos ini sa labing-madali nga tion,importante gihapon nga wala ginpadalian ang pagbusisi sa hagna.
Ginpahayag pa sini nga gin-anunsyo ni Senate President Juan Miguel Zubiri nga posible matapos ang deliberasyon sang Senado sa Maharlika Investment Fund Bill sa Semana Santa ukon sa una nga semana sa Abril.
Disyembre sang ginpasar sang Kamara sa third and final reading ang amo nga hagna kag gin-presentar na ini sang administrasyon sa World Economic Forum sa Switzerland sang nagligad nga semana.
Si Senator Mark Villar ang nag-file sang Senate version sang Maharlika Investment Fund bill ukon Senate Bill 1670 sang nagligad nga Enero 12.
Sa amo nga hagna sa Senado, nalakip gihapon ang Bangko Sentral ng Pilipinas nga amo ang kuhaan sang pondo.
Ginpahayag man ni Marcos nga gin-reject sini ang proposal nga magakuha sang portion sa annual income sang government-owned and controlled corporations agud mangin seed capital sang proposed Maharlika Sovereign Fund. ##
