Iloilo – Suportado ni Iloilo 2nd District Iloilo Rep. Michael Gorriceta ang nangin lihuk ni Sultan Kudarat 2nd District Rep. Horacio Suansing Jr. nga pasabton ang mga indibidwal nga amo ang sa likod sang large-scale agricultural smuggling sa mga lokal nga pantalan sa pungsod.
Matandaan nga sa ginpatigayon nga hearing sang House Committee and ways and means, ginpahayag ni Suansing nga nagakaalarma na siya sa wala madeklarar nga agricultural products nga nagasulod sa pungsod.
Sa interview sang Bombo Radyo kay Gorriceta, iya ginpahayag nga isa ka maayo nga lihok kun ipa-subpoena ang mga brokers, importers kag facilitators nga ginatudlo may kaangtanan sa large-scale smuggling.
Suno kay Gorriceta, pinaagi sa House Resolution 311, nga ginco-sponsor ni Suansing kag ni Nueva Ecija, 1st District Rep. Mikaela Suansing, mapapas ang outright kag technical smuggling.
Katuyuan man sini suno kay Gorriceta nga matumod ang mga opisyal sang Bureau of Customs kag Department of Agriculture nga utok sang illicit importation sang commodities pinaagi sa recycled kag expired import permits.
Gin-athag man sang mamalidha nga may basehan si Suansing kag nagpatigayon sila sang pagpanalawsaw antes ginbulgar ang pangalan sang mga ginapahayag large-scale agricultural smugglers.
Nagakadapat man suno kay Gorriceta nga pasabton ang mga ginapahayag indibidwal kag consignee nga ginatudlo involve sa agricultural smuggling sa diin matabo ini sa hearing sa masunod nga semana.
Sa tion nga mapapas ang smuggling, pat-od suno sa mamalidha nga mabarato na ang agricultural products.
Sa subong, ang Pilipinas ang nagapangatubang sang problema sa smuggling sa diin madamo sang mga agricultural products ang ginadeklarar nga lain nga item kag na-intercept sang Bureau of Customs — ang principal agency nga nagatutok sa pagtumod sa mga smuggled goods.
