Magabisita sa Pilipinas ang pinuno sang Department of Defense sang Estados Unidos sang Amerika.
Suno sa Washington, Enero 29 ang schedule sang paghalin ni Defense Secretary Lloyd Austin III para sa iya byahe sa Republic of Korea kag Pilipinas.
Lauman nga makaatubang sini ang senior government kag military leaders sa duha ka pungsod kag mapabaskog pa ang regional stability kag ang defense partnerships sa Estados Unidos sang Amerika.
Suno pa sa White House, nagapamatuod ini sang commitment sang Amerika nga mapabilin nga hilway kag bukas ang Indo-Pacific.
Suno naman kay House Speaker Martin Romualdez, makaatubang ni Austin si Secretary Carlito Galvez Jr. nga amo ang gin-appoint nga head sang defense and security sector sa Pilipinas subong nga bulan.
Halin pa sang nagliligad nga bulan, ginpahayag nga may yara sang seryoso nga diskusyon sa tunga sang Pilipinas kag Amerika sa pag-conduct sang joint patrols sa West Philippine Sea.
Ang pagbisita ni Austin sa Pilipinas ang kasunod sang serye sang engagements sa tunga sang Pilipinas kag Amerika sa idalom sang Marcos Jr. administration.
Mas nag-improve ini ipaanggid sa relasyon sang duha ka pungsod sa idalom anay sang Duterte administration bangud mas gin-develop sang former chief executive ang kaangtanan sa China kag Russia.
Sang Septyembre 2022, matandaan nga nagkit-anay man sanday President Ferdinand Marcos Jr. kag US President Joe Biden sa New York samtang sang Nobyembre 2022 naman nag-bisita si US Vice President Kamala Harris sa Palawan. ##
