Iloilo City – Nabutang sa dako nga pamahog sa pagluntad sang kalalat-an ang bilog nga Europe bangud sa pagkahubas sang tubig ilabi na sa mga water reservoir.
Ini kasunod man sang paandam sang mga siyentipiko sa posible kahalitan nga matuga sang pagnubo sang surface water levels nga narecord humalin sang 2018 tubtob 2019 bangud sa heatwaves kag sang 2022, nangin maathag ang konsekwensiya nga dulot sini.
Sa interview sang Bombo Radyo kay Dr. Reynand Dumala-on, PhD Researcher sa University of Auckland sa New Zealand, iya ginpahayag nga ang pagkahubas sang tubig ang resulta sang lapnagon nga pagbuhin sang mga puno kun sa diin ang holding sang tubig ang naga amat-amat nga nagasaylo sa iban nga area.
Suno kay Dumala-on, ang industrialization ukon ang amat-amat nga pagtukod sang mga residential areas kag manufacturing industries ang rason sang pagmala sang water reservoir nga may dako nga epekto sa sektor sang agrikultura.
Sa subong, nagaantos man ang iban nga industriya kaangay sang mga hydroelectric power plants bangud sa kakulang sang tubig.
