Ginpanginwala sang China nga naggamit ini sang lasers direkta sa crew sang barko sang Pilipinas sang yara ini sa resupply mission sa dagat nga sakop sang Ayungin Shoal sang Pebrero 6.
Suno kay Chinese Foreign Ministry spokesman Wang Wenbin, wala naga-reflect sang kamatuoran ang mga alegasyon sang Pilipinas.
Ginpanindugan sini ang iya una nga statement nga nagsulod ang Philippine Coast Guard vessel sa “Ren’ai Reef” nga sakop sang China kag napilitan ang Chinese coast guard nga mag-akto sa idalom sang layi rason nga ginpaandaman ang Philippine vessel nga maghalin sa amo nga lugar.
Pahayag ni Wang, sa amo nga proseso, naggamit ang China Coast Guard ship sang hand-held laser speed detector kag hand-held greenlight pointer agud ma-takos ang distansya kag kag kadasigon sang barko sang Pilipinas kag mag-signal sang direksyon agud masiguro ang navigation safety.
“We need to highlight the fact that the China Coast Guard ship did not direct lasers at the Philippine crew, and the hand-held equipment does not inflict damage on anything or anyone on the vessel. The Philippine side’s allegation does not reflect the truth,” pahayag ni Wang.
Martes sang nag-protesta ang Department of Foreign Affairs (DFA) sa paggamit sang China sang military-grade lasers kag delikado nga maneuvers batok sa BRP Malapascua nga yara sa resupply mission para sa Filipino troops sa Ayungin Shoal.
Gin-athag man ni Wang nga nag-istorya na si Chinese ambassador to the Philippines Huang Xilian sa Filipino officials partikular na kay Philippine military chief Gen. Andres Centino agud istoryahan ang amo nga insidente.
Antes ang depensa sang China, nagpaguwa na sang statement ang Japan, Australia, Canada, United Kingdom, kag Germany sa ginhimo sang amo nga pungsod. Ang suod nga kaalyado sang Pilipinas nga Estados Unidos sang Amerika ang nagpaandam man sa Beijing kag nagsiling nga nagatindog ini para sa Pilipinas. Suno pa sa US, maga-invoke sang US mutual defense commitments ang anuman nga himuon sang China nga armed attack batok sa Philippine military vessels ukon aircraft. ##
