Iloilo City – Nagsungka na sa kapulisan ang mag-amay nga suspetsado sa pagpangluthang sa kasilingan nga pintor sa Iloilo City Proper.
Ang biktima amo si Antonio Estrella, 28, residente sang Zone 3, Barangay Rizal Estanzuela, Iloilo City Proper.
Ang suspek naman amo sanday Ricky Diesto, 61 kag Joseph Diesto, 28, kag lunsay residente sang amo man nga lugar.
Matandaan nga sa inisyal nga imbestigasyon, nagpalapit ang biktima nga hubog sa tyangge sang mga suspek kag nag-istorya.
Sang ulihi, ginhampak sini sang baseball bat ang dingding nga amo ang rason sang komosyon.
Sa interview sang Bombo Radyo kay Police Captain Mavin Laraño, hepe sang Iloilo City Police Station 1, iya ginpahayag nga indi kuntani hungod nga tiruhon sang mga suspek ang biktima, apang bangud na impito ang mga ini, ginluthang si Estrella.
Suno kay Laraño, bangud sa insidente, natalana nga mag-file ang biktima sang kaso nga frustrated homicide sa mga suspetsado.
Nahibaluan nga nakaangkon sang pilas sa nagkalain-lain nga parte sang lawas ang biktima.
Yara na karo sa estable nga kondisyon si Estrella.
Nagpanugyan naman si Laraño nga mahimo magpadulong sa talatapan sa tion nga ma yara sang nakit-an nga mga wanted persons kag ang mga naga-obra sang iligal nga aktibidad agud mahatagan sang igtalupangod sang mga otoridad.
