Iloilo City – Ginareklamo sang pila ka mga residente sang Iloilo City ang pagpanukot sang water bill sang Metro Pacific Iloilo Water apisar nga wala sang may nagatubod nga tubig.
Sa interview sang Bombo Radyo kay Julius Dejongoy, isa ka retired police officer kag residente sang Barangay Caingin, La Paz, Iloilo City, iya ginpahayag nga humalin sang Nobyembre 2022 tubtob Pebrero 2023, wala may nagatubod nga tubig sa iya linya.
Suno kay Dejongoy, nagapadulong na lamang ini sa water refilling stations agud maka-secure sang mainom nga tubig.
Ginpahayag sang natungdan nga kun magapadayon ang pagpanukot sang nasambit nga water distribition utility, pat-od nga ipautod nalang sini ang linya sang ila tubig.
Matandaan nga nagpatuman sang water supply schedule ang Metro Pacific Iloilo Water sang Pebrero 21 agud patigayunon ang pagkay-o ukon maintenance activity sa linya sang tubig sa Iloilo City.
Nahibaluan nga ginkabalak-an sang Iloilo City Health Office ang leakage sa mga tubo sang Metro Pacific Iloilo Water rason nga mas ginpili sang 98.3% sang mga residente ang magbakal nalang sa mga water refilling stations.
