Kasunod sang pag-igrab sang tensyon sa tunga sang China kag Pilipinas bangud sang laser incident sa Ayungin Shoal, ginkumpirma sang Philippine Coast Guard (PCG) nga tubtub subong, nagatinir pa gihapon ang Chinese vessels sa exclusive economic zone (EEZ) sang Pilipinas.
Nakit-an ini sang gin-conduct ang Maritime Domain Awareness (MDA) flight sa ibabaw sang Ayungin Shoal kag Sabina Shoal sa West Philippine Sea.
Ginpahayag nga yara sa 26 ka ginasuspetsahan nga Chinese maritime militia vessels ang naka-angkorahe sa teritoryo sang pungsod.
Ginkumpirma man sang National Task Force for the West Philippine Sea nga samtang nagapalapit ang PCG aircraft sa airspace sa ibabaw sang Sabina Shoal, nakabaton pa ini sang radio challenges sa lenggwahe nga English kag Chinese halin sa China Coast Guard.
Nagbalos man sa pag-radyo ang PCG kag nagsabat nga naga-conduct ini sang routine maritime flight sa airspace sa ibabaw sang EEZ sang Pilipinas. Sang nagpalapit pa ang eroplano sang Pilipinas sa kalayuon nga 10 nautical miles sa Ayungin Shoal, nakabaton pa ini sang indi maathag nga radio challenge halin sa personnel sang China — kag nagbalos man ang personnel sang Pilipinas kag nagmandu nga maghalin na ang CCG sa area.
Isa sa na-obserbaran sang coast guard amo ang apat ka Chinese militia vessels nga naka-angkorahe sa sulod mismo sang Ayungin Shoal.
Ang Chinese coast guard vessel 5205 naman nga amo ang nag-taya sang “military-grade” laser light sa BRP Malapascua sang nagligad nga semana ang naghalin na sa Kalayaan Island Group kag nagbalik na sa Hainan, China.
Sa kabug-usan nga MDA flight, nagpadayon ang Pilipinas sa pag-radyo sa CCG vessels kag sa suspected Chinese maritime militia vessels sa areas nga nagapalibot sa Ayungin Shoal kag Sabina Shoal.
Ginsugid man ini sa Armed Forces of the Philippines (AFP) personnel nga amo ang naka-station sa BRP Sierra Madre sa Ayungin.
Matandaan nga sang nagligad lang nga semana, nag-file sang diplomatic protest ang Department of Foreign Affairs (DFA) bangud sa laser light incident sa Ayungin Shoal.
Una na nga nagsabat ang China nga wala ini sang intensyon nga mahalitan ang crew sang Pilipinas; apang baliskad ini sa natabo bangud pila sa Philippine crew ang nagsuprer sang temporary blindness bangud sa amo nga insidente. ##
