Gin-deklarar ni Presidente Ferdinand ‘Bongbong’ Marcos Jr. nga special non-working holiday subong nga adlaw, Pebrero 24, agud dumdumon ang Epifanio de los Santos Avenue ukon EDSA People Power Revolution.
Ang ika-37 nga anibersaryo sang maragtason nga event ang gina-komemorar sa kada Pebrero 25 apang subong nga tuig natuon ini sa Sabado nga adlaw.
Sa Proclamation No. 167, ginsaylo ni Marcos ang holiday sa Pebrero 24 agud nga maka-avail sang benepisyo sang mas malawig nga weekend ang mga tawo.
Ginmanduan man sang presidente ang Department of Labor and Employment (DOLE) nga mag-isyu sang circular agud ma-implementar ang proclamation para sa private sector.
Ang 1986 Edsa People Power Revolution isa ka maragtason nga hitabo sa Pilipinas nga nagtapos sang rehimen ni former President Ferdinand Marcos Sr. nga amo ang amay ni President Bongbong Marcos.
Diri sa Iloilo, may patigayunon nga hublag-protesta ang cause-oriented groups sa atubang sang Iloilo Provincial Capitol karon sa hapon.
Pangunahan sang Bagong Alyansang Makabayan (BAYAN) Panay ini nga rally.
Naka-secure ini sang permit halin sa Iloilo City Police Office kag sa Public Safety and Transportation Management Office nga amo ang department in-charge sa enforcement sang traffic regulations. ##
