Kadungan sang ika-37 nga anibersaryo sang 1986 Edsa People Power Revolution nga amo ang nagpahalin kay late president Ferdinand Marcos,Sr. sa pwesto, nagpahayag ang iya anak nga si President Bongbong Marcos Jr. nga nagatanyag ini sang “hand of reconciliation” sa mga tawo nga may lain-lain nga political persuasions.
Sa iya mensahe subong nga adlaw, ginsaad sang presidente nga nagaupod siya sa bilog nga nasyon sa pagdumdom sa People Power Revolution nga iya ginlaragway bilang tion sa maragtas nga nagtunga sa pumuluyong Pilipinhon.
“I once again offer my hand of reconciliation to those with different political persuasions to come together as one in forging a better society — one that will pursue progress and peace and a better life for all Filipinos,” pahayag ni Marcos.
Gin-engganyo man sini ang publiko nga magtingob agud nga makatuod sang mas maayo nga sosyudad.
Nagpadala man si Marcos Jr. sang bulak sa People Power Monument sa Quezon City.
Nahibaluan nga ini ang una nga tion nga sa idalom sang isa ka Marcos gin-dumdum ang pagpahalin sa amay nga Marcos sa pwesto.
Mangin ang pakaisa nga si House Speaker Martin Romualdez ang nagpaguwa man sang statement kag nagsiling nga kaupod siya ni President Marcos nga nga nagapangamuyo para sa pag-isa sang pungsod kag magbuligay para sa matuod nga pagbag-o.
Sa bahin sang isa pa ka anak nga si Senator Imee Marcos, ginpakigbahin sini nga nagkadto siya sa lulubngan sang iya amay.
Nakasulat sa picture sang senador ang mga tinaga nga, “Nasa tabi mo pa rin ako 37 years after.”
Sa bahin sang Aquino Family, may ginpaguwa man nga statement nga nagsiling nga 37 ka tuig ang makaligad, wala sang duda, buhi sa gihapon ang espirit sang EDSA People Power Revolution.
“The EDSA People Power Revolution showed the world that it was possible for a courageous and truly unified people to reclaim the freedom that a dictatorship had denied them. We believe that the indomitable spirit exemplified by one Filipino nation 37 years ago remains alive to this very day,” kabahin sang statement sang Aquino family.
Matandaan nga pareho nga nangin importante ang nangin papel nanday late senator Benigno Aquino Jr. kag ex-president Corazon Aquino sang tion sang Martial Law kag EDSA revolution sang 1986. ##
