Nagmandu na si Presidente Ferdinand ‘Bongbong’ Marcos, Jr. sa Philippine National Police (PNP) nga i-identify ang “political hotspots” sa pungsod kasunod sang serye sang pagpang-atake sa mga opisyal sang gobyerno subong nga 2023.
Suno kay Marcos, ginhatagan sini sang instruction si Interior Secretary Benhur Abalos kag ang pulis nga himuon ini nga examination nga kinaandan lamang nga ginahimo kun may yara sang eleksyon.
Sa masami, ang Commission on Elections (Comelec) ang nagatumod sang “hot spots” ukon mga area nga may history sang intense rivalry, may kalakasan nga ginhimo ang private armed groups, may unqualified individuals nga nagagamit sang iligal kag indi lisensyado nga mga armas, kag may seryoso nga extremist threat.
Naghingyo man si Marcos nga pabaskugon pa ang kampanya batok sa iligal nga mga armas kag i-dismantle ang “private armies.”
Gin-isyu ni Marcos ini nga statement kasunod sang pagpang-atake kag pagpatay kay Negros Oriental Gov. Roel Degamo nga isa sa iya suod nga kaalyado sa pulitika.
“Again, the killing of Governor Degamo is entirely unacceptable and it will not stand… This cannot be — this cannot go unpunished,” pahayag sang presidente.
Pahayag pa ni Marcos, nagapati siya nga pulitika ang yara sa likod sang amo nga assassination. Ginsiling man sini nga ginalantaw na subong sang otoridad kun isolated case ang natabo nga massacre sa puluy-an ni Degamo.
Ini bangud antes pa man ang massacre sa puluy-an ni Degamo, may tatlo ka iban pa nga government officials nga nangin biktima man sang pagpang-ambush subong nga tuig. ##
