Yara na sa site ang mga imbestigador sang Civil Aviation Authority of the Philippines-Aircraft Accident Investigation and Inquiry Board agud kumpirmahon ang nagkalawasak nga parte sang Cessna 206 plane nga na-missing 44 ka adlaw na ang nakaligad.
Una na nga gin-report sang otoridad nga was-ag ang mga parte sang aircraft kag naglalapta sa bukid kun sa diin ini nagtibusok.
Lunsay patay ang sakay sini nga sanday pilot captain Eleazar Mark Joven kag pasahero nga sanday Josefa Perla Espana, 59; Val Kamatoy, 34; Mark Eiron Siguerra, 21; Rom Joshtle Manaday, 16; kag Xam Siguerra 10.
Suno sa Isabela Incident Management Team, maamat-amat na papanaog ang anum ka mga bangkay, dal-on ini sa Cauayan City para sa forensic investigation para sa dugang nga identification.
Posible nga tubtub tatlo ka adlaw pa ang pagpapanaog sang mga bangkay bangud sa kabudlay man sa pagsaka sang responders kag bangud sa malain nga tyempo.
Nakit-an ang eroplano sa north sang Barangay Ditarum sa Divilacan, Isabela nga sulod pa sa 20-kilometer radius sang Maconacon airport nga amo kuntani an destinasyon sini sang nagligad nga Enero 24.
Ginpahayag pa sang management team nga may duha na ka nauna nga attempts nga i-search ang amo nga area apang wala nangin madinalag-on bangud sang mabaskog nga daludo sang tubig sa suba.
Masobra man 500 ka tawo ang nagbuligay agud makit-an ang missing nga eroplano lakip na ang special action forces halin sa Cordillera, Bicutan, kag Isabela, kag amo man ang AK-9 Man Dog Sniffers kag mga volunteers. ##
