ILOILO CITY – Magasugod na sa Abril 17 ang imbestigasyon sang Senate Committee on Public Order and Dangerous Drugs may kaangtanan sa kamatayon ni Negros Oriental Governor Roel Degamo.
Suno kay Senator Ronald “Bato” dela Rosa, ang ini nga petsa ang gin-request mismo ni Pamplona Mayor Janice Degamo, ang balo sang gobernador.
Una na nga ginpahayag ni Dela Rosa nga naghingyo ang Department of Justice sa Senate panel nga i-delay ang inquiry agud nga makatutok sa pagpasaka sang kaso batuk sa ginapahayag nga masterminds sa krimen.
Patigayunon kuntani ang inquiry sa Marso 15 apang gin-postpone.
Kung madumduman, sang Marso 4, si Degamo kag ang walo ka iban pa ang gin-assassinate.
Subong nga adlaw, ginpahayag ni Justice Secretary Jesus Crispin Remulla nga si suspended Negros Oriental Representative Arnolfo “Arnie” Teves Jr. ang nagagwa nga main mastermind sa kamatayon ni Degamo.
Una na nga ginpanginwala ni Teves nga may kahilabtanan siya sa pagpatay kay Degamo.
