ILOILO CITY – Nagpanawagan ang presidential sister nga si Senator Imee Marcos nga dapat nga magpahamtang sang limitasyon sa pagpatuman sang Enhanced Defense Cooperation Agreement lakip na ang numero sang tropa sang Estados Unidos sa pungsod kag ang kadugayon sang ila nga pagtinir.
Suno kay Marcos nga amo ang chairperson sang Senate Committee on Foreign Relations, ang pag-deploy sang linibo ka mga Amerikano nga nagapatigayon sang exercises adlaw-adlaw ang kaangay lamang nga ang United States forces ang nagapuyo na sa pungsod.
Ang Enhanced Defense Cooperation Agreement nga ginprimahan sang 2014 ang nagahatag sang access sa Estados Unidos sa designated Philippine military facilities kag nagapahanugot sa ila nga magpatindog sang pasilidad, kag magpahamtang sang equipment, aircraft kag barko.
Sang nagligad nga semana, gin-anunsiyo sang administrasyon nga ang bag-o nga mga sites ang ipahamtang sa Naval Base Camilo Osias sa Sta Ana, Cagayan; Lal-lo Airport sa Lal-lo, Cagayan; Camp Melchor Dela Cruz sa Gamu, Isabela; kag Balabac Island sa Palawan.
Ang lima naman ka locations subong ang nahamtang sa Antonio Bautista Air Base sa Palawan, Basa Air Base sa Pampanga, Fort Magsaysay sa Nueva Ecija, Mactan-Benito Ebuen Air Base sa Cebu, kag Lumbia Air Base sa Cagayan de Oro City.
Sang Lunes, ginpahayag ni President Ferdinand Marcos Jr. nga ang agreement ang indi paggamiton para sa offensive actions kag ang China ang wala sang dapat nga kabalak-an.
Pahayag ni Senator Marcos, dapat nga ipasiguro sang gobyerno nga ang ini nga mga agreement camps ang indi paggamiton para sa anuman nga pagpang-atake batuk sa Taiwan ukon sa iban nga pungsod.
Dugang pa niya, ang iya komitiba ang wala sang may nabaton nga pagpamatuk sa amo nga treaty apang dapat nga may yara sang ipahamtang nga “safeguards” agud nga malikawan nga maipit ang Pilipinas sa away sang iban nga mga pungsod.
Sa tion nga matabo ini, indi handa ang pungsod bangud nga wala sang bomb shelters, ukon underground camps, anti-missile forces kag anti-aircraft.
