ALIMODIAN, ILOILO – May anggulo na nga ginasundan ang mga otoridad sa pagluthang-patay sa isa ka anay Citizen Armed Force Geographical Unit (CAFGU) member sa Barangay Cabacanan Proper, Alimodian, Iloilo.
Ang biktima amo si Norito Cagud, 64, residente sang Barangay Cabacanan Rizal sa amo nga banwa.
Sa interview sang Bombo Radyo kay Police Staff Sergeant Angello Amoyan, imbestigador sang Alimodian Municipal Police Station, iya ginpahayag nga ginadudahan sang mga pumuluyo sa ila barangay nga manughiwit ang biktima.
Suno kay Amoyan, tatlo ka mga wala pa nakilal-an nga suspek ang ginapatihan nga nagpatay sa biktima.
Nahibaluan nga samtang nagapungko sa talipapa ang biktima, ginpalapitan ini sang mga suspek kag ginluthang.
Sa autopsy examination, nagwa man nga may igo ang biktima sa nalikod nga bahin sang iya ulo kag naglapos sa iya kilay.
Ginkumpirma naman sang otoridad nga .45 caliber pistol ang armas nga gingamit sa krimen.
