Iga-convene sa Martes, Oktubre 6, ang Task Force El Niño bilang kabahin sang pagpanghanda sang Iloilo Provincial Government sa mangin epekto sang El Niño phenomenon.
Ini ang kasunod sang pahayag sang state weather bureau nga maga-apekto ang “strong El Niño” sa pungsod kag posible maglawig tubtub sa masunod nga tuig.
Sa interview sang Bombo Radyo kay Retired Police Colonel Cornelio Salinas, head sang Iloilo Provincial Disaster Risk Reduction and Management Office (PDRRMO), iya ginpahayag nga nanuhay-tuhay nga sektor ang napaidalom sa sini nga task force.
Ini nagalakip sang para sa water security, health security, food security, energy, kag public safety.
Ginpatpat ni Salinas nga sa idalom sang health security sector, kinahanglan nga may health advisories nga mapaguwa ang concerned agencies agud nga malikawan ang mga balatian nga dala sang init.
Dala man diri ang mangin preparasyon, mga medical intervention kun may heat-related illnesses, mga pahanumdom kun san-o pwede kag indi magguwa, kag iban pa.
Sa food security naman suno sa PDRRMO official, napaidalom ang mga pahanumdom sa mga mangunguma kun ano ang pwede matanum kun wala na gid sang ulan. Diri man nalakip ang mangin proteksyon kag mahimo mahatag nga pagkaon sa mga kasapatan nga maapektuhan man sang phenomenon.
Magluwas diri, importante man ang water security kun sa diin nalakip ang mga tikang kun paano makakinot sang tubig; ang inventory sang mga bubon; kag ang pagsigurado nga may kuluhaan sang tubig nga para sa mga tawo kag para sa agrikultura.
Sa energy sector naman, diri istoryahan ang mga preparasyon kun may mga power interruption ilabi na bangud sang ginalantaw nga pagsaka sang demand sa kuryente.
Sa public safety naman, bangud sa posible mga problema sa pagkaon kag tubig, ginaantisipar man ang mga pag-ilinaway gani nga handaan man ang mga ginamo sa palibot.
“Ang gusto sang governor (Gov. Arthur Defensor), i-convene ini sila [ang mga sector], so that ang kada sini nga lead offices and agencies should come up with their own programs, projects, and activities to address it all,” suno kay Salinas.
Una na nga ginpahayag sang Philippine Atmospheric, Geophysical and Astronomical Services Administration (PAGASA) nga maeksperyensyahan sang halos bug-os nga pungsod ang dry condition, dry spell, kag drought sa pagsulod sang Nobyembre kag Disyembre sini nga tuig.#
