ILOILO CITY – Nagsaka pa sa 83 ang biktima sang ginapatihan starvation cult sa Kenya matapos nga nakutkutan ang dugang nga 10 ka mga lawas nagikan sa mass grave.
Nahibaluan nga ginkutkot sang otoridad ang pila ka bahin sang kakahuyan malapit sa coastal town sang Malindi matapos nakabaton sang impormasyon may kaangtanan sa isa ka kulto nga ginapamunuan ni Paul Mackenzie Nthenge nga nag-enganyo sa iya mga followers nga magpagutom agud nga makita ang Ginuo.
Ang 10 ka mga lawas nga na-recover ang ginalakipan sang tatlo ka mga kabataan.
Bangud sini, nagpromisa si President William Ruto nga pauntaton ang indi mabaton nga religious movements.
Ginapatihan naman nga may pila pa ka sumulunod sang Good News International Church ang ginpangtago sa kakahuyan sa palibot sang Shakahola kag ginakabalak-an nga mapatay sa tion nga indi makita sa gilayon.
