ILOILO CITY – Gin-anunsyo ni U.S. Pres. Joe Biden nga mapadalagan siya para sa ikaduha nga White House term sa 2024.
Ini ang gin-anunsiyo ni Biden pinaagi sa isa ka video nga ginpagwa sang iya bag-o nga campaign team kun sa diin, gindeklara niya nga obligasyon niya nga depensahan ang demokrasya sang Amerika.
Ginlaragway ni Biden ang Republican platforms bilang pamahog sa American freedom kag nagpromisa nga batuan ang pag-limit sang women’s healthcare, pag-utod sang Social Security kag pag-ban sang mag libri samtang nga ginlaslasan ang “MAGA extremists.”
Ang MAGA ang nagakahulugan nga “Make America Great Again” nga amo ang political slogan ni anay presidente Donald Trump, nga amo naman ang ginapatihan nga makasumpong ni Biden sa November 2024 election.
Sa sulod sang duha ka tuig nga pagserbisyo, nakuha ni Biden ang approval sang Congress sa binilyon ka dolyar nga federal funds para sa Coronavirus Disease 2019 pandemic kag para sa bag-o nga mga infrastructure.
Ang edad ni Biden ang ginakabig naman nga historic kag delikado nga sugal para sa Democratic Party, nga nagapangatubang sang mabudlay nga election map sa Senate sa 2024 kag subong, minority sa House of Representatives.
Suno sa mga doktor ni Biden, “fit for duty” pa ini matapos ang examination sang Pebrero.
Si Biden ang updan sa iya 2024 campaign sang iya running mate nga si Vice President Kamala Harris.
Sa tion nga magdaog ini liwat, siya na ang pinakatigulang nga presidente sang Estados Unidos.
