Ginkumpirma ni Passi City Mayor Atty. Stephen Palmares nga gin-deklarar na ang state of calamity sa syudad sang Passi bangud sang epekto sang wala untat nga pagbubo sang ulan dala sang low pressure area kag intertropical convergence zone.
Sa interview sang Bombo Radyo sa alkalde, iya ginpahayag nga ginpaguwa ang deklarasyon agud mahulag ang disaster fund sang local government unit (LGU) kag mahatag ang kinahanglanon sang mga pumuluyo sa amo nga component city.
Sandig sa pinakaulihi nga rekord sang LGU, yara sa 3,000 ka mga pamilya ang apektado nga katumbas sang ginabanta 7,000 ka mga indibidwal. Sa 51 ka mga barangay sa syudad, 32 ang apektado sang baha.
“Daya nga low pressure area nagtuga ka makahambal ako nga flash floods nga dasig ya pagsaka sang tubig kag nagbutang ka 32 naton ka barangay nga naapektuhan ka pagbaha,” suno sa alkalde.
May mga balay nga reported nga nakaangkon sang partial nga halit apang wala sang mayor nga guba sa government structures.
Nagapadayon subong suno sa alkalde ang pagpanghatag sang ayuda sa mga apektado nga mga residente nga ang iban yara gihapon sa evacuation centers.
Wala sang klase sa syudad sang Passi sa tanan nga lebel subong kag buwas nga adlaw, Mayo 4, agud pasulabihon ang safety sang mga estudyante kag mga school personnel.#
