ILOILO CITY – Magapasaka sang kaso sa Ombudsman si Iloilo City Councilor Plaridel Nava batok sa International Builders Corporation nga amo ang kontraktor sang kontrobersyal nga Ungka Flyover, kag ang mga opisyales sang Department of Public Works and Highways nga naangot sa proyekto.
Sa interview sang Bombo Radyo kay Councilor Nava, iya ginpahayag nga paglapas sa Republic Act 3019 ukon Anti-Graft and Practices Act kag Gross Neglect of Duty ang i-file sini nga kaso.
Suno kay Nava, kinahanglan nga may manabat sa damages sang depektibo nga flyover nga nagtuga sang huol sa mga Ilonggos.
Paathag sang natungdan nga ini ang mangin lihuk niya bangud wala sang may nagapangisog nga magdala sang kawsa sa pagkaayo sang flyover.
Ginpabutyag sang konsehal nga nabudlayan ini sa sitwasyon sang kaangay nga mga Ilonggos kun sa diin maathag nga ginakawatan ang mga ini.
Nagpanawagan naman si Nava sa mga civil society, cause oriented groups, kag religious groups nga magtipon kag magpatigayon sang rally nga nagakondenar sa natabo sa Ungka Flyover.
