Nahimo na lang nga Severe Tropical Storm ang Bagyo Betty samtang padayon ini nga nagahulag pa-naaminhan.
Ulihi ini nga nasiplatan sa kalayuon nga 505 km naaminhan-nasidlangan sang Itbayat, Batanes.
Dala sini ang kabaskugon sang hangin nga tubtub sa 110 km/h malapit sa sentro kag pagmadlos nga tubtub sa 135 km/h. Nagahulag ini pa-naaminhan nasidlangan sa kadasigon nga 15 km/h.
Sa subong, ang nagaisahanon nga lugar nga napaidalom sa Tropical Cyclone Wind Signal 1 amo ang Batanes kun sa diin posible may yara sang minimal tubtub minor nga pamahog sa kabuhi kag propiedad.
Samtang nagahulag si Betty palayo sa pungsod, ang Southwest Monsoon ukon Habagat ang mangin mas dominante nga magatuga sang pag-ulan sa pungsod subong nga adlaw.
Kun wala sang significant changes sa track ukon extent sang tropical cyclone winds sang Betty, posible nga bawion na ukon i-lift ang Wind Signal sa Batanes karon sa udto ukon karon sa hapon.
Base sa track forecast, magabiya si Betty sa Philippine Area of Responsibility karon sa hapon ukon karon sa gab-i.
Sa guwa sang Pilipinas, ini nga severe tropical storm ang posible nga mag-landfall ukon maglabay malapit sa Okinawa Island sa Japan karon sa gab-i ukon buwas sa aga.
Subong nga adlaw, posible magpanalithi kag magapangilat kag magamadlos ang hangin sa Leganes, Zarraga, Pavia, portion sang Iloilo City, kag portion sang Santa Barbara sa sulod sang isa tubtub duha ka oras kag maapektuhan ang kaiping nga mga lugar.
Gina-abisuhan ang tanan nga mag-observe sang precautionary measures sa posible impact lakip na ang flash floods kag landslides. #
