Temporaryo nga nagagamit sang baroto ang mga residente nga nagatabok sa Paliwan Bridge nga nagakonekta sa banwa sang Laua-an kag Bugasong sa Antique.
Ini matapos nga naglapaw ang tubig sa ginhimo nga temporaryo nga alagyan ukon access road kag tubtub subong nga aga, indi gihapon maagyan.
Sa interview sang Bombo Radyo kay Mr. Broderick Train, pinuno sang Provincial Disaster Risk Reduction and Management Office sang Antique, iya ginpahayag nga 10 ka pumpboats ang ginhatag sang local government unit.
Ang local government unit man mismo ang naghatag sang bulig para sa fuel kag sa operasyon sang mga pumpboats samtang gina-asikaso ang stranded nga mga motorista,
Kun balikan, kahapon, ginatos ka mga pumuluyo kag motorista ang stranded sa amo nga area.
Ginpahayag man ni Train nga apisar nag-ayo ayo na subong ang sitwasyon sa Antique kag indi na tuman ka bunog ang ulan, may ginabanta 50 pa ka mga pamilya nga nagapabilin sa evacuation centers.
Ini nga mga residente ang nagikan sa apat ka mga banwa sa amo nga probinsya. #
