ILOILO CITY- Na-refer na gid man sa House Committee on Public Works ang House Resolution 721 nga nagapangabay sang pagpatigayon sang legislative inquiry sa pagpatukod sang depektibo kag atrasado nga Ungka kag Aganan flyovers.
Sa interview sang Bombo Radyo kay Iloilo 2nd District Rep. Michael Gorriceta nga co-author sang resolution nga una gin-file ni Kabataan Partylist Rep. Raoul Manuel, iya ginpahayag nga kahapon nabasa na sa plenaryo ang amo nga house resolution kag nalakip na sa agenda sang kumitiba nga ginapamunuan ni Rep. Romeo Momo sang 1st District sang Surigao del Sur.
Apang,suno kay Gorriceta, bangud nga naka-adjourn na ang kongreso sang una nga regular session, hulaton pa tubtob sa pagbukas naman sang second regular session sa Hulyo 24 antes maumpisahan ang inquiry.
Ginpahayag naman ni Gorriceta nga apisar naka-adjourn subong ang kongreso, posible nga magpatigayon sang special session para sa amo nga inquiry apang indi ini madali-dali bangud madamo sang dapat ikonsiderar partikular na ang logistics kag availability sang mga tawo nga mangin kabahin sang inquiry ilabi pa kun patigayunon ini sa Iloilo.
