ILOILO CITY- Nagalaum ang mga pumuluyo sa Brgy. Hibao-an, Mandurriao, Iloilo City nga matapos sa natalana nga petsa ang Hibao-an flyover kag wala sang problema.
Sa interview sang Bombo Radyo kay Arnold Bilbao, residente sa lugar, iya ginpahayag nga indi malikawan nga magkabalaka ang mga ini kasunod man sang natabo sa Ungka flyover nga apisar natapos na, wala sa gihapon ini napuslan bangud palpak ang pagpatukod.
Nahibaluan nga sa subong, ginapadayon na sang International Builders Corporation (IBC) ang pag-construct sang approach sang amo nga flyover.
Ginpahayag naman ni Department of Public Works and Highways Region 6 Assistant Regional Director Engr. Jose Al Fruto nga na-download na sang ahensya ang P100 million nga additional nga budget halin sa General Appropriations Act.
Magluwas sa pag-construct sang approach, palaparon man ang portion sang dalan sa kilid sang flyover.
Ang proyekto ang may target date nga Disyembre para makompleto.
