ILOILO CITY- Nagaka-stress na si Department of Public Works and Highways Region 6 Director Engr. Nerie Bueno sa kontrobersyal nga Ungka kag Aganan Flyovers.
Lunsay International Builders Corporation ang contractor sang duha ka mga flyovers.
Ang Ungka Flyover nagabalor P680 million samtang ang Aganan Flyover nagabalor P802 million.
Sa interview sang Bombo Radyo kay Engr. Bueno, iya ginpahayag nga ginhambalan niya si Public Works Secretary Manuel Bono-an tuhoy sa geotechnical investigation nga himuon kuntani sa Aganan flyover kag nagpabor man ini.
Apang suno kay Engr. Bueno, kinahanglan pangitaan pa ini sang pondo bangud apisar madamo ang pondo sang ahensya, may yara na ini sang ginapainan para sa iban nga proyekto.
Appropriate fund ang kinahanglan sang ahensya kag wala pa sang may nakita nga pondo.
Sa Ungka Flyover, pahayag niya, kun sin-o man ang madaog nga contractor sa bidding, dapat nga dasigon man nila ang pagkaayo bangud amo ina ang luyag sang tanan.
Apisar nga ang ginhatagan igtalupangod sa subong amo ang Ungka flyover, wala man ginapabay-an sang director ang Aganan flyover bangud indi pwede pahayag niya nga i-suspend na lang forever ang construction.
Gin-ako man ni Engr. Bueno nga nagaka-stress ini bangud sa nagakakibot sa mga problema nga nagatuhaw sa duha ka mga flyovers.
Surprising man dugang pa niya nga kun kaisa siya pa ang ginabasolsa kapalpakan sang duha ka mga flyovers.
Matandaan nga wala pa isa ka tuig nga nagapungko bilang director sang DPWH Region 6 si Engr. Bueno.
Siya ang nagbulos kay anay Regional Director Engr. Tiburcio Canlas.
