ILOILO CITY- Nagpabutyag sang frustration si Antique Governor Rhodora Cadiao sa Department of Public and Highways Region 6 sa wala naumpisahan nga bailey bridge sa narumpag nga Paliwan Bridge nga nagakonekta sa banwa sang Bugasong kag Laua-an.
Matandaan nga narumpag ang Paliwan Bridge sang naglaslas ang Bagyo Paeng sang Oktubre 2022.
Sa interview sang Bombo Radyo kay Governor Cadiao, iya ginpahayag nga nagalaom ini kuntani nga naumpisahan ang pagpatukod sang temporaryo nga taytay, apang mas ginhatagan sang prayoridad ang bridge rechanneling.
Suno kay Cadiao, makapila man ini ka beses nga nagpadala sang sulat kay DPWH Secretary Manuel M. Bonoan agud hatagan sang igtalupangod ang bailey bridge nga wala natandog sa sulod sa pito ka bulan, apang nagapabilin nga wala sang sabat.
Ginpahayag dugang sang natungdan nga nagpain ang national government sang P300-million nga pondo para sa konstruksyon sang Paliwan Brdige nga ginpasalig ni Presidente Ferdinand “Bongbong” Marcos Jr. sa diin himuon ini nga twin bridge.
Kabahin man sa pondo sang Department of Budget and Management amo ang P15-Million nga pondo para sa rechanneling.
Sa subong, nangin alternatibo nga ruta sang mga pumuluyo amo ang pag-gamit sang pumpboat agud makatabok sa pihak nga banwa.
